علی اصغر مهِ انور
سوسوزدان اوخلانان اوغلوم
گوزون آچ بیرجه گل هوشه
بوغازی اوخلانان اوغلوم
سنی گتدوم بو میدانه
باتیردی حرمله قانه
گله لعنت بو دورانه
اولوب کاریم فغان اوغلوم
سنه سو وئرمدی عدوان
ائدوبلر قانیوه غلطان
آنون قالدی عجب گریان
اولوبدور باغریقان اوغلوم
چتیندور داغ هجرانون
که آز قالدی چخا جانون
توکولسه گر یره قانون
یانار کون و مکان اوغلوم
منیم شیرین زبانیم سن
بو جسمیم ایچره جانیم سن
گوز آچ روح و روانیم سن
یوخودان بیر اویان اوغلوم
سنی بیر اوخ سالوب دلدن
آیردی بلبلی گولدن
سنون تک خوردا بلبلدن
قالوب بوش گلسِتان اوغلوم
الون قالدی دوداقونده
منی قویدون فراقونده
بو درد اشتیاقونده
من ئولّم ناتوان اوغلوم
سنون تک منده عطشانم
یانار قلبیم پریشانم
بو چولده دیده گریانم
اولوب قدّیم کمان اوغلوم
نظر قیل « کاتب » نالان
یازار نوحه ائدر افغان
اولور هر بزمیده گریان
ائدر اشکین روان اوغلوم
شاعر: میرزا محمدصادق کاتب اردبیلی
ثبت دیدگاه